அனுர ஆட்சியில் தொடரும் நில ஆக்கிரமிப்பு!!

மக்களின் காணிகள் மக்களுக்கே வழங்கப்படும்” என்று தெற்கில் முழங்கி ஆட்சிப்பீடமேறிய ஜனாதிபதி அநுரகுமார திஸாநாயக்கவின் அரசாங்கத்திலும், வடக்கில் தமிழ் மக்களின் பூர்வீக நிலங்கள் இராணுவத்தின் பிடியிலேயே வைக்கப்பட்டிருப்பது தற்போதைய ‘நல்லாட்சி’ முகமூடியைக் கிழித்தெறிந்துள்ளதாகப் பாதிக்கப்பட்ட மக்கள் குற்றம் சாட்டுகின்றனர்.

வலி. வடக்கு மயிலிட்டிப் பகுதியில், உயர் பாதுகாப்பு வலயமாக ஆக்கிரமிக்கப்பட்டுள்ள தமது சொந்தக் காணிகளை விடுவிக்கக் கோரி, இராணுவத்தினரின் “கொமாண்டோ” பங்களா முன்பாக காணி உரிமையாளர்கள் இன்றைய தினம் ஐந்தாவது வாரமாகவும் வெள்ளிக்கிழமைப் போராட்டத்தை மிக ஆவேசமாக முன்னெடுத்துள்ளனர்.

1990 முதல் இன்றுவரை: 36 ஆண்டுகால அகதி வாழ்க்கை

வலி. வடக்கின் 249, 256, 248, 251 மற்றும் 255 ஆகிய கிராம அலுவலர் பிரிவுகளைச் சேர்ந்த தமிழ் மக்கள், கடந்த 1990ஆம் ஆண்டு ஜூன் மாதப் பகுதியில் சிறிலங்கா படையினரின் பாரிய இராணுவ நடவடிக்கை காரணமாகத் தமது சொந்த வீடுகளையும், விவசாய நிலங்களையும் விட்டுவிட்டு வீதிக்குத் தூக்கியெறியப்பட்டனர்.

முள்ளிவாய்க்கால் பேரவலம் நடந்து முடிந்து, போர் முடிவுக்கு வந்துவிட்டதாகக் கூறப்பட்டு 17 ஆண்டுகள் கடந்துவிட்ட நிலையிலும், இன்றும் அப்பகுதிகளில் இருந்து பாதுகாப்புத் தரப்பினர் வெளியேற மறுத்து வருகின்றனர். மக்களின் வாழ்வாதாரமாக விளங்கிய 651 ஏக்கர் வரையிலான நிலப்பரப்பு இன்னும் “உயர் பாதுகாப்பு வலயம்” என்ற போர்வையிலேயே இராணுவத்தினரால் சட்டவிரோதமாகத் தக்கவைக்கப்பட்டுள்ளது.

“பணம் கேட்கவில்லை, எமது நிலத்தையே கேட்கிறோம்” – மக்களின் குமுறல்

“நாங்கள் அரசாங்கத்திடம் வாழ்வதற்குப் பணம் கேட்கவில்லை. எமது சொந்தப் பணத்தில், எமது உழைப்பில் வாங்கிய காணியை இராணுவப் பிடிக்குள் இருந்து மீட்டுத்தருமாறுதான் கோருகிறோம்” என்று மயிலிட்டிப் போராட்டத்தில் கலந்துகொண்ட பொதுமகன் ஒருவர் மிகவும் உருக்கமாகத் தெரிவித்தார்.

மேலும், அவர் தற்போதைய அநுரகுமார திஸாநாயக்கவின் அரசாங்கத்திற்கு விடுத்துள்ள எச்சரிக்கை மிக முக்கிய அரசியல் அவதானிப்பாகப் பார்க்கப்படுகிறது:

“மகிந்த ராஜபக்ச அரசாங்கம் தமிழ் மக்களுக்குச் செய்த தீமைகளும் கர்ம வினைகளுமே அந்த ஆட்சியை முழுமையாக இல்லாமல் செய்தது. அதேபோல், மக்களின் காணிகளை விடுவிப்பதாக வாக்குறுதி வழங்கிவிட்டு, தற்போது எங்களை வீதியில் இறங்கிப் போராட வைக்கும் அநுர அரசாங்கமும், மக்களைத் துன்புறுத்தும் இந்த கர்ம வினையால் நிலைகுலையப் போவது உறுதி. மகிந்தவுக்கு நடந்ததை அநுர நினைவில் கொள்ள வேண்டும்.”

எதிர்வரும் மே 25ஆம் திகதி முதல் பௌத்தர்களின் புனித நாளான ‘வெசாக் தினம்’ வரை, வலி. வடக்கு பிராந்தியம் முழுவதும் கருப்புக் கொடிகளைப் பறக்கவிட்டுப் பாரிய அளவிலான தொடர் போராட்டங்களை முன்னெடுக்கவுள்ளதாகப் போராட்டக் குழுவினர் அறிவித்துள்ளனர். இந்த நில மீட்புப் போராட்டத்தில் கட்சிப் பேதங்களைக் கடந்து அனைத்துத் தமிழ் அரசியல்வாதிகளும், அரச நிர்வாக உத்தியோகத்தர்களும் சிவில் அமைப்புகளும் அலையெனத் திரண்டு வர வேண்டும் எனப் போராட்டக்காரர்கள் பகிரங்க அழைப்பு விடுத்துள்ளனர்.

இலங்கையில் ஆட்சி மாற்றங்கள் ஏற்பட்டாலும், தமிழ் மக்களின் பூர்வீக நிலங்களை இராணுவ மயமாக்கல் மற்றும் பௌத்த மயமாக்கல் மூலம் ஆக்கிரமிக்கும் பேரினவாதக் கொள்கையில் எந்த மாற்றமும் நிகழவில்லை என்பதையே வலி. வடக்கின் இந்த 5ஆவது வாரப் போராட்டம் உணர்த்துகின்றது. சர்வதேசச் சமூகத்தின் கவனத்தை ஈர்க்கும் வகையில் இந்த வெசாக் தினக் கருப்புக்கொடிப் போராட்டம் திருப்புமுனையாக அமையுமா என்பதைப் பொறுத்திருந்தே பார்க்க வேண்டும்.