தமிழின அழிப்பின் சூத்திரதாரிகளை சந்திக்காது புறக்கணிப்போம்!

சிறீலங்காவின் அனுரா அரசும் மெல்லக் கொல்லப்படும் தமிழர் நீதியும்

சிறீலங்காவில் ஆட்சி மாற்றங்கள் நிகழ்கின்றன. அரசுகள் மாறுகின்றன. புதிய வாக்குறுதிகள் முன்வைக்கப்படுகின்றன. ஆனால் பல தசாப்தங்களாக தமிழர்கள் எதிர்பார்த்து நிற்கும் நீதி மட்டும் இன்னும் தொலைதூரக் கனவாகவே உள்ளது.

வடக்கு மற்றும் கிழக்கில் வாழும் தமிழ் மக்களுக்கு நீதி என்பது வெறும் நீதிமன்றத் தீர்ப்பு அல்ல. காணாமல் ஆக்கப்பட்ட தங்களுடைய உறவினர்களைப் பற்றிய உண்மை அறிதல், போரில் உயிரிழந்தவர்களின் குடும்பங்களுக்கு பதில் கிடைத்தல், நிலங்கள் தொடர்பான பிரச்சினைகளுக்கு தீர்வு, அரசியல் உரிமைகள் ஆகிய அனைத்தும் அதனுடன் இணைந்தவை.

அனுரகுமார திசாநாயக்க தலைமையிலான புதிய அரசாங்கம் மாற்றத்தையும் நல்லாட்சியையும் வலியுறுத்தி ஆட்சிக்கு வந்தது. ஊழலை எதிர்ப்பது, அரசியல் அமைப்பில் மாற்றத்தை ஏற்படுத்துவது, அனைவருக்கும் சமத்துவமான ஆட்சி வழங்குவது போன்ற எதிர்பார்ப்புகள் மக்களிடையே உருவாகின. ஆனால் தமிழர் சமூகத்தின் பார்வையில் முக்கியமான கேள்வி ஒன்று தொடர்கிறது:

பல ஆண்டுகளாக நிலுவையில் இருக்கும் தமிழர் நீதிக்கான கேள்விகளுக்கு நடைமுறையான தீர்வு எப்போது கிடைக்கும்?

காணாமல் ஆக்கப்பட்டோரின் குடும்பங்கள் பல ஆண்டுகளாக போராடி வருகின்றனர். தங்கள் பிள்ளைகள், கணவர்கள், சகோதரர்கள் மற்றும் உறவினர்களுக்கு என்ன நடந்தது என்பதை அறிய அவர்கள் தொடர்ந்து கோரிக்கை விடுத்து வருகின்றனர். காலம் செல்லச் செல்ல, அவர்களில் பலர் முதுமையடைந்து வருகின்றனர். சிலர் தங்கள் உறவினர்களின் உண்மையை அறியாமலேயே உயிரிழந்துள்ளனர்.

நீதி தாமதிக்கப்படும்போது அது வெறும் தாமதமாக இருப்பதில்லை. பாதிக்கப்பட்ட குடும்பங்களுக்கு ஒவ்வொரு ஆண்டும் ஒரு புதிய வேதனையாக மாறுகிறது.

அதேபோல், போரின் இறுதி காலத்தில் இடம்பெற்ற தமிழின அழிப்பிற்கான நீதியும் மற்றும் சர்வதேச மனிதாபிமானச் சட்ட மீறல்கள் தொடர்பான குற்றச்சாட்டுகளுக்கும் நம்பகமான விசாரணை தேவைப்படுகிறது. உண்மையை வெளிக்கொணர்வது எந்த ஒரு சமூகத்தையும் பழிவாங்குவதற்காக அல்ல; எதிர்காலத்தில் இதுபோன்ற துயரங்கள் மீண்டும் நிகழாமல் இருப்பதற்காகவும், பாதிக்கப்பட்டவர்களின் கண்ணியத்தை மீட்டெடுப்பதற்காகவும் ஆகும்.

தமிழர்களுக்கு தேவையானது வெறும் அரசியல் வாக்குறுதிகள் அல்ல. உண்மை, நீதி, பொறுப்புக்கூறல் மற்றும் நிலையான அரசியல் தீர்வு ஆகியவை நடைமுறையில் வெளிப்பட வேண்டும்.

ஒரு அரசாங்கம் தன்னை மாற்றத்தின் அரசாங்கமாக முன்வைக்கும்போது, அந்த மாற்றத்தின் அளவுகோல் பொருளாதாரம் அல்லது நிர்வாகம் மட்டும் அல்ல. பல தசாப்தங்களாக தீர்வு காணப்படாமல் இருக்கும் இனப்பிரச்சினை மற்றும் மனித உரிமை தொடர்பான கேள்விகளையும் அது எவ்வாறு கையாள்கிறது என்பதில்தான் அதன் உண்மையான சோதனை இருக்கிறது.

தமிழர்களின் நீதிக்கான கோரிக்கை இன்று மட்டும் தொடங்கியதல்ல. அது தலைமுறைகளைக் கடந்து வந்த கோரிக்கை. அந்தக் குரலை மேலும் காலம் தாழ்த்துவது, பாதிக்கப்பட்ட மக்களின் நம்பிக்கையை மேலும் பலவீனப்படுத்தும்.

தமிழர் நீதி என்பது யாருக்கும் எதிரான பழிவாங்கல் அல்ல. அது உண்மையை அறியும் உரிமை. அது காணாமல் போனவர்களின் குடும்பங்களின் உரிமை. அது பாதிக்கப்பட்டவர்களின் கண்ணியத்திற்கான உரிமை. அது சமத்துவமான எதிர்காலத்திற்கான அடித்தளம்.

தமிழர்களின் நீதி மெல்லக் கொல்லப்படாமல், உண்மை வெளிப்பட்டு, பொறுப்புக்கூறல் உறுதி செய்யப்பட்டு, நீதி நிலைநாட்டப்பட வேண்டிய அவசியத்தை அலட்சியம் செய்யும் அனுர அரசு, தொடர்ச்சியாக கட்டமைக்கப்பட்ட இன அழிப்பை செய்து வருகின்றதோடு, தமிழ் மக்களின் இருப்பை எதிர்காலத்தில் இல்லாதொழிக்க பாடுபட்டு வருகின்றது.

அதன் தொடர்ச்சியே புலம்பெயர் தமிழர்களை சந்தித்து சர்வதேச நெருக்கடியை தணித்து, தமிழரின் விடுதலைச் செயற்பாடுகளுக்கு சாவுமணி அடிக்க முனைகின்றது, இதனை மக்கள் விழிப்போடு எதிர்கொள்வதோடு எமது எதிர்காலத்தை நாமே தீர்மானிக்கும் சக்தியா மாறவேண்டும்.