ஒஸ்லோ:
நோர்வேயின் பல பகுதிகளை நோக்கி இந்த வாரம் கடும் வெப்ப அலை நகர்ந்து வருவதாக வானிலை ஆய்வாளர்கள் தெரிவித்துள்ளனர். குறிப்பாக கிழக்கு நோர்வே (Østlandet) மற்றும் ஒஸ்லோ சுற்றுவட்டாரப் பகுதிகளில் வெப்பநிலை 27°C முதல் 30°C வரை உயரக்கூடும் என எதிர்பார்க்கப்படுகிறது.
நோர்வேயில் ஒரு இடத்தில் தொடர்ந்து ஐந்து நாட்கள் அல்லது அதற்கு மேல் 27°C-ஐ மீறும் வெப்பநிலை பதிவானால் அது “வெப்ப அலை” (Hetebølge / Heatwave) என வகைப்படுத்தப்படுகிறது. தற்போதைய வானிலை முன்னறிவிப்புகள் இந்த அளவுகோலை சில பகுதிகள் எட்டக்கூடும் என்பதைக் காட்டுகின்றன.
வானிலை நிபுணர்களின் கூற்றுப்படி, உயர் காற்றழுத்த மண்டலம் நாட்டின் மீது நிலை கொண்டிருப்பதால் வானம் பெரும்பாலும் மேகமின்றி தெளிவாகவும் வெயிலாகவும் இருக்கும். சில பகுதிகளில் இரவிலும் வெப்பநிலை 20°C-க்கு கீழ் குறையாத “வெப்பமான இரவுகள்” (Tropisk natt / Tropical Nights) ஏற்பட வாய்ப்புள்ளதாகவும் தெரிவிக்கப்பட்டுள்ளது.
மேலும், கடந்த 30 ஆண்டுகளுடன் ஒப்பிடுகையில் நோர்வேயில் வெப்ப அலைகள் அடிக்கடி ஏற்படுவது கணிசமாக அதிகரித்துள்ளதாக வானிலை மற்றும் காலநிலை ஆய்வுகள் சுட்டிக்காட்டுகின்றன. குறிப்பாக கிழக்கு நோர்வே பகுதிகளில் வெப்ப அலைகளின் எண்ணிக்கை இரட்டிப்பாக உயர்ந்துள்ளதாக ஆய்வுகள் தெரிவிக்கின்றன.
அதிக வெப்பம் நிலவும் நாட்களில் பொதுமக்கள் போதிய அளவு தண்ணீர் அருந்தவும், நேரடி வெயிலில் நீண்ட நேரம் இருப்பதைத் தவிர்க்கவும், முதியவர்கள் மற்றும் குழந்தைகள் மீது சிறப்பு கவனம் செலுத்தவும் சுகாதார அதிகாரிகள் அறிவுறுத்தியுள்ளனர்.
இதவேளை, இங்கிலாந்து, ஜெர்மெனி, பிரான்ஸ், இத்தாலி உள்ளிட்ட ஐரோப்பிய நாடுகள் கடும் வெப்ப அலைகளினால் பாதிக்கப்பட்டுள்ளமை குறிப்பிடத்தக்கது.
24.06.2026