உக்ரைனுக்கு ராணுவப் பயிற்சியாளர்களை அனுப்புவது குறித்து பிரான்ஸ் விரைவில் அறிவிக்கலாம் என இராஜதந்திரிகள் தெரிவித்துள்ளனர். சில நட்பு நாடுகள் கவலை தெரிவித்தாலும், ரஷ்யாவிடமிருந்து எதிர்ப்பு இருக்கும்போதிலும், பிரான்ஸ் விரைவில் உக்ரைனுக்கு இராணுவ பயிற்சியாளர்களை அனுப்பக்கூடும் , மேலும் உக்ரைன் ஜனாதிபதியின் விஜயத்தின் போது அடுத்த வாரம் தனது முடிவை அறிவிக்கலாம் என்று மூன்று இராஜதந்திர வட்டாரங்கள் தெரிவித்தன.
ரஷ்யாவுடன் நேரடி மோதலை அதிகப்படுத்தக்கூடும் என்று சில ஐரோப்பிய ஒன்றியப் பங்காளிகள் அஞ்சினாலும், உக்ரைனின் போர் முயற்சிகளுக்கு அத்தகைய உதவியை வழங்கும் நாடுகளின் கூட்டணியை உருவாக்கி வழிநடத்த பாரிஸ் நம்புவதாக அவர்கள் தெரிவித்தனர் .
பல நூறு பயிற்சியாளர்களை அனுப்புவதற்கு முன், ஒரு பணியின் முறைகளை மதிப்பிடுவதற்கு, பிரான்ஸ் ஆரம்பத்தில் குறைந்த எண்ணிக்கையிலான பணியாளர்களை அனுப்பும் என்று தூதர்களில் இருவர் தெரிவித்தனர்.
கண்ணிவெடி அகற்றுதல், உபகரணங்களை இயக்குதல் மற்றும் போர் விமானங்களுக்கான தொழில்நுட்ப நிபுணத்துவம் ஆகியவற்றை மேற்கத்திய நாடுகள் வழங்குவதை மையமாக வைத்து பயிற்சி அளிக்கப்படும் என்று அவர்கள் தெரிவித்தனர்.
உக்ரேனிய மோட்டார் பொருத்தப்பட்ட படையணிக்கு பாரிஸ் நிதியுதவி, ஆயுதம் மற்றும் பயிற்சி அளிக்கும் என்றும் தெரிவிக்கப்பட்டுள்ளது..
இந்த ஏற்பாடுகள் குறித்த அறிவிப்பை அடுத்த வாரம் எதிர்பார்க்கலாம் என்று கூறப்படுகிறது.
இரண்டாம் உலகப் போரின்போது நாஜி ஜேர்மன் படைகளை விரட்டியடிக்க நார்மண்டியில் நேச நாட்டு வீரர்கள் இறங்கிய டி-டேயின் 80வது ஆண்டு நினைவு தினமான ஜூன் 6 அன்று உக்ரேனிய ஜனாதிபதி வோலோடிமிர் ஜெலென்ஸ்கி பிரான்சுக்கு வரவுள்ளார். அவர் நாளை மறுநாள் பாரிசில் பிரான்ஸ் அதிபர் இம்மானுவேல் மக்ரோனை சந்தித்து பேசுகிறார்.
இதனிடையே, உக்ரைனின் உயர்மட்ட தளபதி திங்களன்று பிரெஞ்சு இராணுவ பயிற்றுனர்கள் உக்ரேனிய பயிற்சி மையங்களுக்கு விரைவில் செல்ல அனுமதிக்கும் ஆவணத்தில் கையெழுத்திட்டதாக கூறினார்.