உக்ரைன் மீதான போரில் இதுவரை 66,000 ரஷ்ய ராணுவ வீரர்கள் கொல்லப்பட்டுள்ளதாக ரஷ்ய ஊடகம் ஒன்று தகவல் வெளியிட்டுள்ளது. ரஷ்யாவில் செயல்படும் Mediazona என்ற ஊடகமே தற்போது முதல் முறையாக இறப்பு எண்ணிக்கையை வெளியிட்டுள்ளது. மேலும், தங்களுக்கு தெரிந்த ராணுவ வீரர்கள் பட்டியல் ஒன்றை தயாரித்துள்ள அந்த நிறுவனம் சர்வதேச செய்தி நிறுவனங்களின் பட்டியலுடன் ஒப்பிட்டுள்ளது.
கடந்த ஏப்ரல் மாதம் வெளியிட்டிருந்த தகவலில், 50,000 வீரர்கள் கொல்லப்பட்டுள்ளதாக அவர்களின் பெயர்களை வெளியிட்டிருந்தது. தற்போது ஆகஸ்டு 30ம் திகதி வெளியிட்டுள்ள பட்டியலில், 66471 பெயர்களை குறிப்பிட்டுள்ளது.
மேலும் கடந்த 4 வாரங்களில் மட்டும் 4,600 பேர்கள் மரணமடைந்துள்ளதாக Mediazona குறிப்பிட்டுள்ளது. அத்துடன் இறந்த பல வீரர்களின் தகவல்கள் வெளியிடப்படவில்லை என்றே கூறியுள்ளது.
இஸ்லாமியர்கள் பெரும்பான்மை கொண்ட Bashkortostan பகுதியில் அதிக இறப்பு பதிவாகியுள்ளது. இங்கு 2,578 பேர்கள் இறந்துள்ளனர். இறந்தவர்களில் 12,000 பேர்கள் சிறை கைதிகள் என்றும் கூறப்படுகிறது.
முன்னதாக ரஷ்ய ஜனாதிபதி விளாடிமிர் புடின் ஜூன் மாதம் தெரிவிக்கையில், உக்ரைனில் ஏறக்குறைய 700,0000 ரஷ்ய வீரர்கள் போரிடுவதாக கூறியிருந்தார். ஆனால் இழப்பு குறித்து ரஷ்ய நிர்வாகம் இதுவரை தகவல் வெளியிட்டதில்லை.
கடைசியாக 2022 செப்டம்பர் மாதம் வெளியிட்டுள்ள தரவுகளில் 5937 வீரர்கள் இதுவரை கொல்லப்பட்டுள்ளதாக ரஷ்யா தெரிவித்திருந்தது. இதனிடையே, போரின் முதல் இரண்டு ஆண்டுகளில் 31,000 உக்ரேனிய வீரர்கள் கொல்லப்பட்டதாக உக்ரைன் ஜனாதிபதி வோலோடிமிர் ஜெலென்ஸ்கி பிப்ரவரியில் தெரிவித்திருந்தார்.
இதேவேளை நேற்று
தென்மேற்கு ரஷ்ய நகரமான பெல்கொரோட் மீது உக்ரெய்ன் மேற்கொண்ட தாக்குதலில் ஐவர் உயிரிழந்துள்ளதுடன் மேலும் 46 பேர் காயமடைந்துள்ளனர்.
காயமடைந்தவர்களில் ஏழு குழந்தைகள் உட்பட 37 பேர் உக்ரெய்னின் வடக்கே சுமார் 40 கிலோ மீற்றர் தொலைவில் அமைந்துள்ள வைத்தியசாலையில் அனுமதிக்கப்பட்டுள்ளதாக சர்வதேச ஊடகங்கள் செய்தி வெளியிட்டுள்ளன.
இந்த தாக்குதலுக்கு ரஷ்யாவின் வெளியுறவு அமைச்சகம் கண்டனம் வெளியிட்டுள்ளது.