டெல்லியில் நடந்த வன்முறையில் பலத்த காயமடைந்து சிகிச்சை பெற்று வந்த மேலும் 5 பேர் இறந்ததையடுத்து, வன்முறைக்கு பலியானோர் எண்ணிக்கை 35 ஆக உயர்ந்துள்ளது.
டெல்லி வடகிழக்கு பகுதியில் கடந்த ஞாயிற்றுக்கிழமை குடியுரிமை திருத்த சட்டத்தை ஆதரித்து ஒரு சாரார் ஊர்வலம் நடத்தினார்கள்.
இதற்கு அந்த பகுதி முஸ்லிம்கள் எதிர்ப்பு தெரிவித்தனர். இதனால் இரு தரப்பினருக்கும் இடையே மோதல் ஏற்பட்டது.
அந்த மோதல் மிகப்பெரிய கலவரமாக வெடித்தது. வீடுகள், கடைகள் மற்றும் பொது சொத்துக்களுக்கு தீவைக்கப்பட்டது. நூற்றுக்கணக்கான வீடுகள், வாகனங்கள் எரிக்கப்பட்டன. சரமாரியாக கல்வீச்சு சம்பவங்களும் நடந்தன.
சில இடங்களில் கலவரக்காரர்கள் துப்பாக்கியால் சுட்டனர். இதனால் வடகிழக்கு டெல்லியில் கலவரமும், பதட்டமும் மேலும் அதிகரித்தது. அடுத்த 2 நாட்களும் (திங்கட்கிழமை, செவ்வாய்க்கிழமை) கலவரம் நீடித்தது.
கலவரத்தில் 210-க்கும் மேற்பட்டவர்கள் காயம் அடைந்தனர். அவர்கள் மருத்துவமனைகளில் அனுமதிக்கப்பட்டு சிகிச்சை அளிக்கப்பட்டு வருகிறது. காயம் அடைந்தவர்களில் 30 சதவீதம் பேர் குண்டு காயம் அடைந்தவர்கள் என்று தெரிய வந்துள்ளது.
அவர்களில் சிலர் சிகிச்சை பலனின்றி நேற்றும், இன்று காலையிலும் உயிரிழந்தனர். இதனால் டெல்லி கலவர பலி உயர்ந்தபடி உள்ளது. நேற்று மதியம் வரை கலவரத்துக்கு பலியானவர்கள் எண்ணிக்கை 25 ஆக இருந்தது.
இன்று (வியாழக்கிழமை) காலை பலியானவர்கள் எண்ணிக்கை 30 ஆக அதிகரித்தது. இந்தநிலையில் மருத்துவமனைகளில் இருந்தவர்களில் மேலும் 5 பேர் சிகிச்சை பலனின்றி உயிரிழந்தது காலை 9 மணிக்கு தெரியவந்துள்ளது. இதனால் பலியானவர்கள் எண்ணிக்கை 35 ஆக உயர்ந்துள்ளது.
கலவரம் தொடராமல் இருப்பதற்காக டெல்லி வடகிழக்கு பகுதியில் துணை நிலை ராணுவ வீரர்கள் குவிக்கப்பட்டுள்ளனர். அவர்கள் கலவரப் பகுதிகளில் ரோந்து பணிகளில் ஈடுபட்டுள்ளனர். இதனால் நேற்று பெரிய அளவில் மோதல் சம்பவம் எதுவும் நடைபெறவில்லை.
கலவரம் தொடர்பாக டெல்லி போலீசார் 18 வழக்குகள் பதிவு செய்து விசாரித்து வருகிறார்கள். ஏராளமானவர்கள் மீது முதல் தகவல் அறிக்கையில் குற்றச்சாட்டு கூறப்பட்டுள்ளது. அவர்களில் 106 பேர் கைது செய்யப்பட்டு இருக்கிறார்கள்.