ஏழாலை பகுதியில் போதை மாத்திரைகளை உடைமையில் வைத்திருப்பதாக சுன்னாக பொலிசாருக்கு கிடைக்கப்பெற்ற இரகசிய தகவலின் அடிப்படையில் சம்பவ இடத்திற்கு விரைந்த பொலிஸார் இளைஞனை கைது செய்ததுடன், இளைஞனிடம் இருந்து 840 போதை மாத்திரைகளையும் மீட்டுள்ளனர்.
கைது செய்யப்பட்ட இளைஞனை சிறீலங்கா பொலிஸ் நிலையத்தில் தடுத்து வைத்து பொலிஸார் விசாரணைகளை முன்னெடுத்துள்ளனர். குறித்த இளைஞன் ஏற்கனவே போதை மாத்திரைகளுடன் கைதாகி அது தொடர்பிலான வழக்கு விசாரணைகள் நீதிமன்றில் நிலுவையில் உள்ளதாக சிறீலங்கா பொலிஸார் தெரிவித்துள்ளனர்.
அதேவேளை செவ்வாய்க்கிழமை (22) மானிப்பாய் சிறீலங்கா பொலிஸ் பிரிவில் 1400 போதை மாத்திரைகளுடன் இளைஞன் ஒருவர் கைது செய்யப்பட்டுள்ளமையும் குறிப்பிடத்தக்கது.
இதேவேளை
யாழ்ப்பாணம் – சுழிபுரம் பெரியபுலோ பகுதியில் இரண்டு போத்தல்கள் கசிப்புடன் இரண்டு சந்தேகநபர்கள் கைது செய்யப்பட்டுள்ளனர்.
குறித்த இருவரும் நேற்றையதினம் (23.10.2024) கைது செய்யப்பட்டதாக சிறீலங்கா பொலிஸார் தெரிவித்துள்ளனர்.
வட்டுக்கோட்டை சிறீலங்கா பொலிஸார் முன்னெடுத்த சுற்றிவளைப்பு நடவடிக்கையின் போது, ஒரே பிரதேசத்தை சேர்ந்த இருவர் தலா ஒரு போத்தல் கசிப்புடன் கைது செய்யப்பட்டுள்ளனர்.