தமிழ் முரசம் வானொலி
வெள்ளிப் பூக்களை
பூத்து நிற்கின்றது ..
அதன் ஒலிக்கதிரில்
வானத்தின் வெள்ளிகளைக் கோர்த்து
மாலை சூடி வாழ்த்துவோம் !
தமிழீழப் போர்
கந்தகத் தீயில்
வெந்த போது
ஒலிக்கற்றையில் தீயேற்றி
“இனவெறியை”
வெளிச்சம் போட்டுக் காட்டி
முரசறைந்த போரொலியை
வாழ்ந்திடுவோம் !
புலத்தில் ஊன்றிய
தமிழீழ வித்துக்களின்
தமிழ் மரபைக் காக்க
இன உணர்வை ஊட்டிய
ஒலித்தாயை வாழ்த்துவோம் !
தமிழர் ஒருங்கிணைப்புக் குழுவின்
குழந்தை ..
வெள்ளிவிழா காண்கிறது !
தமிழர் பண்பாடி வாழ்த்துவோம் !
தாயாக வேரில்
புலத்தின்
பாலத்தை ஊன்றி
வழிசமைத்த
தமிழ் முரசம் வானொலியை
வாழ்ந்திடுவோம் !
கலையின் விழி திறந்து
தேச விடியலின்
உணர்வைக் காட்டி ..
சமுதாய விழிப்பூட்டிய
இனப்பற்றின்
தமிழ் முரசம் ஒலியே !
நின் தலையில்
அகர முடி சூடி
வாழ்த்துகின்றோம் !
தேசியக் குயில்களின்
குரலோசையில்
நேசம் கொண்டு
புலத்தின் இசைச் சோலையில்
புதுப் புது குயில்களை
பாட்டிசைக்க வழி சமைத்தீர் !
நின் நெறியை
பாமாலை சூடி வாழ்த்துகிறோம் !
தமிழீழ உணர்வலையை
தமிழ் முரசம் ஒலியலையால்
உலகெங்கும் இணைத்து
நவதளங்களில்
ஒலி .. ஒளி .. ஏற்றி
உருவேற்றும்
தமிழ் முரசம் வானொலியே !
நின்னை !
உவகை பொங்க வாழ்த்துகின்றோம் !
தமிழ் முரசம் வானொலியின்
ஆணிவேராய் ஊன்றி நிற்கும்
தேசப்பற்றாளர்களின்
உணர்வுக் கரங்களை
இறுக்கப் பற்றி
உச்சத்து வானின் விரிவின்
எல்லைவரை ஒலிக்க
வாழ்த்தொலிப்போம் !
தமிழீழம் நோக்கிய கரங்கள்
ஒன்றிணைவோம் !
தமிழீழ விடியலின்
தடைகள் தகர்ப்போம் !
வெள்ளி .. பொன்னாகும் ..
வைரங்கள் மேவும் ..
வைர நெஞ்சாகி
தமிழீழ விடியல் காண்போம் !.
” தேசப் பற்றின் வேரில் ஆழ்ந்தால்
தேச விடியலின் வழி பிறக்கும் “
