கஜேந்திரகுமார் மீது தொடரும் அரச அடக்குமுறை! நாட்டை விட்டு வெளியேற தடை விதித்த நீதிமன்றம்!!

இந்நிலையில், நாடாளுமன்ற கூட்டத்தொடரில் திரு. கஜேந்திரகுமார் கலந்துகொள்ளும் பட்சத்தில், தன் மீது மேற்கொள்ளப்பட்ட கொலைமுயற்சி மற்றும் காவல்துறையின் வரைமுறை மீறிய செயற்பாடுகள் குறித்து நாடாளுமன்றத்தில் ஆதாரங்களை முன்வைத்து வெளிப்படுத்துவாரென எதிர்பார்க்கப்பட்ட நிலையில், இவ்வாறு நடக்கும் பட்சத்தில் ஸ்ரீலங்கா அரசுக்கு சர்வதேச அழுத்தங்கள் வரலாமென கருத்துக்கள் முன்வைக்கப்பட்டு வரும் அதேவேளையில், திரு. கஜேந்திரகுமார் நாடாளுமன்ற கூட்டத்தொடரில் கலந்துகொள்வதை தடுக்கும் முயற்சிகள் கொழும்பில் முடுக்கிவிடப்பட்டுள்ளன. இதன் ஒரு அங்கமாக, “சிங்கள ராவய” எனும் சிங்கள இனவாத அமைப்பின் சார்பில், நாடாளுமன்றத்துக்கு அருகில் போராட்டமொன்று ஒழுங்கு செய்யப்பட்டு, திரு. கஜேந்திரகுமார், நாடாளுமன்ற உறுப்பினருக்கான சிறப்புரிமையை மீறினாரெனவும் அதற்காக அவரை கைது செய்யவேண்டுமெனவும் சபாநாயகரிடம் கோரிக்கையொன்றை கையளிப்பதற்கான முயற்சிகள் மேற்கொள்ளப்படுவதாக தெரிவிக்கப்படுகிறது.

இதேவேளை, தனது கொழும்பு இல்லத்துக்கு இன்று வந்த கொள்ளுப்பிட்டி காவல்துறையினர், தனிச்சிங்களத்தில் அறிக்கையொன்றை தன்னிடம் கையளித்தபோது, தனிச்சிங்களத்தில் மாத்திரம் தயாரிக்கப்பட்டிருந்த அவ்வறிக்கையை தன்னால் ஏற்றுக்கொள்ள முடியாதென தான் நிராகரித்த நிலையில், அதனை தனது முன்னிலையில் காவல்துறையினர் வாசித்து விட்டு சென்றதாகவும் திரு. கஜேந்திரகுமார் தனது “டுவிட்டர்” பக்கத்தில் குறிப்பிட்டுள்ளார். திரு. கஜேந்திரகுமார் மீது நீதிக்குப்புறம்பான விதத்தில் வழக்கொன்றை தாக்கல் செய்து கடும் நெருக்குவாரங்களை கொடுப்பதற்கு ஸ்ரீலங்கா அரச இயந்திரம் முனைவதன் ஒரு அங்கமாக, அவர் நாட்டை விட்டு வெளியேறுவதற்கு நீதிமன்றம் தடை விதித்துள்ளதாக மேலும் அறிவிக்கப்படுகிறது.