1996 ஆம் ஆண்டு செப்டம்பர் 7 ஆம் தேதி, யாழ்ப்பாணம் சுண்டுக்குளி கல்லூரி மாணவி கிருசாந்தி பலாத்காரம் செய்யப்பட்டு கொலை செய்யப்பட்டார். இந்த துயர சம்பவத்தின் 27 ஆம் ஆண்டு நினைவு தினம் இன்று அனுசரிக்கப்படுகிறது.
கிருசாந்தியைத் தேடிச் சென்ற அவரது தாயார் ராசம்மாள், சகோதரன் பிரணவன் மற்றும் பக்கத்து வீட்டுக்காரர் கிருபாமூர்த்தி ஆகியோரும் இராணுவத்தினரால் கொல்லப்பட்டனர். இந்த கொடூர சம்பவத்தை நினைவுகூர்ந்து, செம்மணியில் இன்று உணர்வுபூர்வமாக அஞ்சலி செலுத்தப்பட்டது.
இந்த சம்பவம் தொடர்பாக ஐந்து இராணுவ வீரர்களுக்கு தண்டனை வழங்கப்பட்டது. அவர்களில் ஒருவரான சோமரத்ன ராஜபக்ஷ, யாழ்ப்பாணத்தில் கைது செய்யப்பட்டவர்களில் பெரும்பாலானோர் சித்திரவதை செய்யப்பட்டு கொல்லப்பட்டு, செம்மணியில் புதைக்கப்பட்டதாக வாக்குமூலம் அளித்தார். 300 முதல் 400 பேர் வரை புதைக்கப்பட்ட புதைகுழிகளை தன்னால் காட்ட முடியும் என்றும் அவர் கூறியிருந்தார். இந்த வாக்குமூலம் இலங்கை இராணுவத்தின் கொடூரமான மனித உரிமை மீறல்களை வெளிச்சத்திற்கு கொண்டு வந்தது.
இந்த துயர சம்பவத்தின் தொடர்ச்சியாக, தற்போது செம்மணி சிந்துபத் மயானத்தில் இருந்து எலும்புக்கூடுகள் மீட்கப்பட்டு வருகின்றன. மீட்கப்ப ட்ட எலும்புக்கூடுகளின் எண்ணிக்கை 200 ஐ தாண்டியுள்ளதாக தகவல்கள் தெரிவிக்கின்றன. சிங்கள பேரினவாத படைகளால் கிருஷாந்தி மிருகத்தனமாக பலாத்காரம் செய்யப்பட்டு கொல்லப்பட்டார் என்ற உண்மை, இந்த நிகழ்வுகளின் பின்னணியில் உள்ள கொடூரமான மனித உரிமை மீறல்களை மீண்டும் ஒருமுறை உலகிற்கு உணர்த்துகிறது.
இந்த எலும்புக்கூடுகள், கிருசாந்தி சம்பவத்துடன் தொடர்புடைய மறைக்கப்பட்ட கொலைகளின் சான்றுகளாக இருக்கலாம் என அஞ்சப்படுகிறது. இந்த மீட்கப்பட்ட எலும்புக்கூடுகள் தொடர்பாக மேலதிக விசாரணைகள் மேற்கொள்ளப்பட்டு, பாதிக்கப்பட்டவர்களுக்கு நீதி கிடைக்க வேண்டும் என்பதே அனைவரின் எதிர்பார்ப்பாகும்.
